የኤማሁስ መንገድ

መጽሔቷን ለማግኘት ይህን ይጫኑ

. . . የዘመናችን ተዋሥኦ በይዘቱም ሆነ በመንገዶቹ በግልብነት በእጅጉ የተጠቃ ነው ። ‘በይዘቱ እንዴት ?’ቢባል ሁነቶች ላይ ያተኮረ እና ወቅታዊነትን ማዕከል ያደረገ በመሆኑ ። አንድም አቋም ከመያዝና ጎራ ከፍሎ ከመናቆር ባለፈ የእውነት የመማር እና የማሰላሰል ጉጉት የማይታይበት በመሆኑ ። በዚህ ተዋሥኦ ውስጥ መሠረታዊ ጥያቄዎችን ማንሣት እና ከሁነቶቹ የሚሻገር እና ሐሳባዊ የሆነ ትንተና ለማካሔድ መሞከር ትኩረት ያስነሣል ፤ ሲብስም አጉል እንደመራቀቅ ይታያል ።

የሚካሄድበት ከባቢ እና ዘመን ደግሞ ሌላ ግልብነት ደርቦለታል ። በእኛ ሀገር ብቻ ሳይሆን በሌሎችም ሀገራት ፣ ከዘመናዊነትና ከቴክኖሎጂ መራቀቅ ጋር ተያይዞ ሕዝባዊ ተዋሥኦ በጠቅላላው ስለቱን እና ርቀቱን እንዲያጣ ሆኗል ። የሚነበብም ሆነ የሚታይ ወይም የሚደመጥ ነገር አጭር መሆን አለበት ። ነገር ግን ጠቃሚና ወሳኝ ርእሶች እንዲህ ባለ መንገድ ሊስተናገዱ አይችሉም ። የሚያጠግብ ፍሬ ከሌለበት የተመልካቹ እና የአንባቢው ብዛት ምን ጥቅም ይኖረዋል ?

እንዲህ ባለው ከባቢ ውስጥ ሁነቶችን ከሁነትነታቸው እና ከሚያመጡት ወቅታዊ ውጤት በተሻገረ መልኩ ለመመልከት እንቸገራለን ። ቀድሞውኑም (እይታችን ከመጥበቡ የተነሣ) ጠባብ አድርገን የቀረጽነውን አጀንዳ በምንገልጽበት መንገድ የበለጠ እናጠብበዋለን ።

ነገር ግን ሁነቶችን እና ሒደቶችን ከመሠረታቸው መመርመራችን እና የምናቀርባቸው መፍትሔዎችም እንዲሁ የማይናወጥ መሠረት ያላቸው መሆናቸው አስፈላጊ ከሆነ ተዋሥኦውም እንዲሁ የጠለቀ እና የረቀቀ መሆን አለበት ። ይህን ለማድረግ ደግሞ ጊዜ ወስዶ ማሰብ ፣ ማንበብ ፣ ማጠናቀር ፣ መወያየት ፣ መሟገት እና እንዲህ ካለው ሒደት የሚወጡትን ሐሳቦች የሚገባውን ጊዜ ወስዶ መጻፍ እና መናገር የግድ ነው ።

በተለይ የጽሑፎች አስፈላጊነት ደግሞ የተለየ ነው ። ጽሑፍ ከሌሎች ሐሳብን ማቅረቢያ አማራጮች ይልቅ ንጥር የሆኑ ሐሳቦች የሚገኙበት መንገድ ነው ። ጸሐፊው ሐሳቡን ለመግለጽ በአንድ ጊዜና ቦታ ሳይወሰን ፣ ደጋግሞ አስቦ ፣ ደጋግሞ ሞክሮ እስኪዋጣለት እና በበቂ መጠን ለማለት የፈለግሁትን ገልጫለሁ ብሎ እስኪያስብ ድረስ ሐሳቡን የሚያጠራበትን ዕድል የሚሰጥ ጎዳና ነው ። በመሆኑም መፍጠር ለምናልመው ተዋሥኦ ጽሑፍ የማይተካ ሚና አለው ። ያለ ጸሑፍ የሐሳቦች የማደግ አቅም የተወሰነ ነው ።

እንዲህ ያለውን ጽሑፋዊ ተዋሥኦ ለማድረግ ደግሞ እንዲህ ላሉ ጽሑፎች የተዘጋጀ መድረክ መኖር አለበት ። አሁን ያለው ከባቢ ግን ጽሑፍን ከጊዜ ወደ ጊዜ እየዘነጋ እና እያገለለ ያለ ነው ። እንዲህ ያለው ጥልቅ እና ሰፊ ተዋሥኦ ቀርቶ ፥ ቀድሞ የነበረው ከወቅታዊ ጉዳዮች ያልዘለለ የጋዜጣ እና የመጽሔት ተዋሥኦ እንኳን ወደ መሞት ቀርቧል ።

ቤተ ክርስቲያን ውስጥ ወዳለው ሁኔታ ስንመጣ ደግሞ ፥ እንዲህ ያለ ደንበኛ ተዋሥኦ ካለመኖሩም በላይ ፥ አሉ የሚባሉትም ምእመናንን ያገለሉ እና ዘመኑ ካመጣቸው ማዕበሎች ጨርሶ የተፋቱ ናቸው ። ራሳቸውን ካገኙበት ቦታ በግትርነት ወደፊት ከመግፋት ባሻገር ፥ መሠረታዊ የሆኑ ጉዳዮችን ላለማንሣት እና የቆሙበትን ቦታ ተገቢነት ላለመፈተሽ የቆረጡ ናቸው ።

በመሆኑም እንዲህ ያለው የጽሑፍ ተዋሥኦ የሚጠነሰስበት እና የሚዳብርበት ፣ ክርስትናን መሠረት ያደረገ መድረክ እንደሚያስፈልግ በማመን ፥ ኤማሁስ ፕሬስ ፥ ይህቺን ኤማሁስ የተሰኘች ፥ በጊዜያዊነት በኤሌክትሮኒክ ሚዲያ ፣ ወደፊት ግን በሕትመትም ጭምር ፥ በየሦስት ወሩ ለሕዝብ የምትደርስ መጽሔት ይዞ መጥቷል ።

፠ ፠ ፠

ኤማሁስ ‘መጽሔት’ ብትሰኝም ቅሉ ይዘቷ ለአካዳሚያዊ ጽሑፎች የሚቀርብ ይሆናል ። ከኤማሁስ ጀርባ ያለው ሐሳብ በትምህርቱ ዓለም (ቢያንስ በፊት) እንደሚደረገው ጥልቀት ያላቸው ጽሑፎችን ማስተናገድ ሲሆን ነገር ግን አሁን እየሆነ እንዳለው ከሕዝባዊው ተዋሥኦ ያልተነጠለ ፣ ይልቁንም በአንባቢነትም ሆነ በጸሐፊነት ለመሳተፍ ለሕዝቡ ክፍት የሆነ ተዋሥኦ መፍጠር ነው ። በመሆኑም ኤማሁስ ከተለመዱት መጽሔቶች በተለየ መልኩ ከሁነቶች ይልቅ መሠረታዊ ሐሳቦች ላይ ያተኮሩ ፥ ወቅታዊ ጉዳዮችን ያማከሉ ነገር ግን ፍልስፍናዊ ይዘት እና ውቅር ያላቸውን ጽሑፎች ታስተናግዳለች ። የጸሐፊውን ስሜቶች እና አስተያየቶች መገለጻቸውን የምትወድ ፥ ነገር ግን ምክንያታዊነት ያልተለያቸው እንዲሁም የፍልስፍና እና የሐቅ መሠረት ላይ የቆሙ መሆናቸውን የምትጠይቅ ፥ ይህም መሆኑ እንዲታወቅ እንደ ትምህርታዊ ጽሑፎች በማጣቀሻዎች መደገፋቸውን የምታስገድድ ፣ ጠባብ በሆኑ የገጽ ብዛት ክልከላዎች ሐሳቦች እንዳይገደቡ ሰፊ ነፃነት የምትሰጥ መድረክ ትሆናለች ።

ከዚህ ይዘቷ እና ውቅሯ የተነሣም ወደ ሕዝብ ለመድረስ ሦስት ወር ያህል በዝግጅት ትቆያለች ። የሚነሡትን ሐሳቦች ስፋትና ጥልቀት ለማስተናገድ ስትል ሆዷን ታሰፋለች ፤ መለስ ያለ መጽሐፍ አክላ ትመጣለች ።

ለዚህ መድረክ የሚመጥኑ ጽሑፎችን ማዘጋጀት በእጅጉ አድካሚ ከመሆኑ የተነሣ ቢያንስ እስከ ጊዜው ድረስ የኤማሁስ አባላት በዋናነት የጸሐፊነት ሚናን መወጣት ቢኖርባቸውም ፣ ተስፋው ግን ከላይ እንደተባለው መድረኩ ሕዝባዊ እንዲሆን እና ብዙዎች በጸሐፊነት እንዲሳተፉ ነው ። ብዙ ሰዎችን ብቻም ሳይሆን ፥ ብዙ ዓይነት ሐሳቦችንም የሚያሳትፍ ተዋሥኦ መሆን አለበት ። የስምምነት እና የመደጋገፍ ብቻ ሳይሆን የሙግትም መድረክ ነው ለመፍጠር የምናልመው ።

ከአባቶቻችን ከሐዋርያት ዘመን ጀምሮ ቤተ ክርስቲያን ትምህርቷን እና ትውፊቷን የጠበቀችው እንዲህ ባለ ክርስቲያኖች እውነትን ፍለጋ በሚሟገቱበትም ተዋሥኦ ጭምር  በመሆኑ እንዲህ ያለው ሙግት ለእኛ ዐዲስ ነገር ሳይሆን የቤተ ክርስቲያንን ትውፊት የማስቀጠል ተግባር ነው ። ሌላው ቀርቶ ከቤተ ክርስቲያን ውጪ ያሉ ሰዎች እንኳን ሊሞግቱን ቢወዱ በቀናነት ለማስተናገድ በራችን ክፍት ይሆናል ። የክርስቲያኖች እምነት ባለማወቅ የሚጠበቅ ሳይሆን ተፈትኖ ያለፈ እና የጠራ መሆን አለበት ። አንድም ቤተ ክርስቲያን ውስጥ ያለነውን ከማጽናት ባለፈ ሌሎችን ወደዚህ ኅብረት መጥራትም የተልዕኮአችን ዋና አካል ስለሆነ ፥ የተዋሥኦውን አድማስ በተቻለ መጠን ማስፋት አስፈላጊ እንደሆነ እናምናለን ። ስለዚህም እንዲህ ያለውን ጥልቅ እና እውነትን መዳረሻው ያደረገ ተዋሥኦ የሚሹትን ሁሉ በማንበብም ፣ በመጻፍም ይሳተፉ ዘንድ እንጋብዛለን ።

እነኋት ኤማሁስ ።

Click to download